office mate sa panaginip

Tiktik (20sept05)

Office mate

Dear Don Honesto,

NAPANAGINIPAN ko po ang aking dating office mate na magkasama sa isang kuwarto. Magara ang kanyang damit na parang desenteng desente. Ako naman ay naka-casual lamang. May dumating na mga bisita at inisa-isa niya akong ipinapakilala sa kanila. Lihim naman akong tuwang-tuwa. Pero, biglang silang nag-away –away at nagrambol sa harap ko sa hindi ko maintindihang dahilan. Nagsisigaw ako hanggang sa magising. Bigyan mo ako ng masusuwerteng numero lalo na sa pagtaya sa jai alai at lotto. Ipinanganak ako noong Hunyo 16, 1970.

OLIVE NG BALAYAN, BATANGAS

Dear Olive,

KUNG office mate ang napaginipan mo, nangangahulugan ito na seryoso ka sa pagtatrabaho at lihim na nangangarap na umasenso ka. Kung ang boss mo napanaginipan mo, nangangahulugan ito na may naghihintay sa iyo na promosyon pero kung ka-level mo lamang ang nakasuot ng magarang damit, intriga at sigalot ang naghihintay sa iyo. Maging maingat sa pagsasalita at pagkilos, maaaring naghihintay sila ng butas upang maipahamak ka. Kung nag-away o nag-rambol, nagsasabi na ikaw ay may internal conflict o nagugulo ang iyong isip sa pagdedesisyon. Sikaping maging kalmante at magdesisyon lamang matapos maligo sa umagang-umaga. Huwag magdedesisyon sa gabi—baka lumala ang problema! Katapat ng office mate ay No. 44; No. 40 ang magarang damit; No. 22 ang silid; No. 18 ang rambol; No. 12 ang pagpapakilala; No. 37 ang bisita. Tipikal sa tulad mong isinilang sa petsang 16 ay maging atubili sa desisyon pero maraming kaibigan ang tutulong sa iyo sa gitna ng mga problema. Pinakabuwenas mo ang No. 7 at No.1. Sa jai alai, isama mo ang No.10. Sa lotto, pumulot ka sa itaas at ihalo ang ilan sa mga sumusunod: 2-7-11-19-23-28-34-38-40-42.
---30—


02. PALMISTRY

Kahit magkagalit, di makakahiwalay si esmi

Dear Sir Dennis,

NATUKSO na rin akong magpa-serox ng guhit ng palad. Gusto kong itanong kung magkakahiwalay kami ng misis ko. Lagi na kaming nag-aaway mula nang masisante ako sa trabaho at nabarkada pa. Kasi’y naman ay nagdedelihensiya lang ako ng pera sa mga kaibigan ko kaya’t nakikisama ako sa kanila. Makahanap pa kaya ako ng matatag na trabaho, Isa akong company driver. Makapagpundar kaya ako ng sariling bahay at lupa? May apat kaming anak, mapagtapos ko kaya sila sa kolehiyo? Ipinanganak ako noong Hunyo 5, 1973.

ALIPIO NG MANDAUE CITY

Dear Alipio,

SA totoo lang, kahit mag-away kayo ng misis mo nang ubod-tindi at magkasakitan—hindi pa rin kayo magkakahiwalay. Nagsosolo kasi ang guhit sa tagiliran ng palad (tingnan ang bilog sa bandang ilalim ng hinliliit). Minsan ka lamang magmamahal at siya na ang makakasama mo sa habang buhay kahit gaano kabigat ang mga suliranin. Marami kang pagsisikap sa buhay kaya’t makakarekober ka at makakakita ng matatag na hanapbuhay sa hinaharap. Marami kasing mumunting guhit na pumaitaas sa kalagitnaan ng Life Line (tingnan ang bilog sa gitna). Ibig sabihin, maraming oportunidad ang kakatok sa iyong pintuan na mapapakinabangan mong lahat. Magagawa mo ring mapag-aral at mapagtapos sa kolehiyo ang iyong apat na anak kasi’y mahahaba at matitikas ang apat na guhit na pumaitaas sa kalamnan ng hinlalaki (tingnan ang bilog sa kalamnan ng hinlalaki). Magagawa mo ring makapagpundar ng sariling bahay at lupa dahil may guhit na pumaitaas sa bandang ilalim ng hinlalato (tingnan ang bilog sa bandang ilalim ng middle finger).
---30---